Autor: Felipe Vieira

Ámsterdam convértese na terceira capital europea na que os viños, licores e augardentes galegos se promocionan de xeito conxunto este ano

Ámsterdam (Holanda), 09 de novembro de 2022.- Ata a capital holandesa viaxaron referencias de viño de máis de 80 adegas galegas, así coma licores dunha ducia de empresas comercializadoras da comunidade autónoma, amparados baixo os selos de calidade dos consellos reguladores que conforman Acruaga, para participar nun acto de degustación no Van der Valk Hotel da cidade. Deste xeito, Ámsterdam convértese, tras París e Londres, na terceira capital europea na que os viños e destilados galegos se promocionan conxuntamente no que vai de ano.
Acruaga desenvolve esta acción promocional en colaboración coa Unión Española de Catadores (UEC), encargada de poñer en marcha o denominado I Salón dos Viños e Augardentes de Galicia en Ámsterdam, que ao longo do día de hoxe se está a levar a cabo na cidade con gran afluencia de público. Neste salón participan un total de 110 marcas de viños e licores de Galicia, amparadas baixo os diversos marchamos de calidade autonómicos.
Segundo destaca Juan Gil de Araujo, presidente de Acruaga, “os Países Baixos representan un dos destinos máis atractivos para as exportacións de viños, augardentes, licores e destilados de Galicia”. Con este showroom conxunto, respaldado pola Xunta, a través do Igape, “pretendemos axudar ás adegas e empresas comercializadoras da comunidade autónoma a afianzar as súas vendas neste potente mercado europeo”.
Público especializado
O I Salón dos Viños e Augardentes de Galicia de Ámsterdam pretende amosar a un público profesional a calidade e diversidade das elaboracións da Galicia vitivinícola, así coma as augardentes e licores que se fan no país. Acruaga activou esta acción promocional no marco do convenio asinado co Igape, cuxo obxectivo é promover a internacionalización dos viños e licores galegos a través de accións divulgativas e formativas conxuntas.
Un convenio que xa favoreceu que os viños e augardentes galegos se exhibiran baixo o mesmo stand, neste 2022, nas relevantes feiras sectoriais Vinexpo (París), no mes de febreiro, e London Wine Fair (Londres), en xuño.
 
+ información

Representantes de 25 adegas amparadas baixo o selo de calidade dos consellos reguladores de viños e augardentes galegos fórmanse nunha xornada acreditada pola Wine & Spirit Education Trust (WSET)

Cenlle (Ourense), 04 de novembro de 2022.- Un total de 25 representantes de adegas amparadas baixo os diferentes selos de calidade dos consellos reguladores de viños e augardentes galegos participaron hoxe no balneario de Laias, en Cenlle (Ourense), nunha xornada formativa en enoloxía homologada pola Wine & Spirit Education Trust (WSET). Esta acción foi impulsada dende a Asoicación de Consellos Reguladores Vitivinícolas Galegos e das II.XX Augardentes e Licores de Galicia (Acruaga), con respaldo da Xunta de Galicia, a través do Igape, e impartida por Jorge Vila, director da Galicia Wine Academy.

A iniciativa enmárcase nas accións de formación para o apoio á internacionalización do sector, que Acruaga impulsa co apoio do Igape. Unha das principais actividades formativas promovidas pola Asociación, no último ano, foi un programa orientado a directivos de empresas vitivinícolas e impartido por docentes da Galician Business School. Neste 2022, as accións formativas de Acruaga culminan coa organización do curso celebrado hoxe, que se corresponde cun nivel 1 da WSET (cualificación de nivel 1 en viños WSET).

“Trátase dun curso de introdución para explorar os principais estilos de viño de forma práctica, desenvolvendo as habilidades sensoriais para describilos e elaborar maridaxes”, destaca Juan Gil de Araujo, presidente de Acruaga.

Aposta pola formación continua

Promover a excelencia, a internacionalización e a formación continua son parte dos obxectivos da asociación que aglutina aos cinco consellos reguladores de viños galegos e ao de augardentes. Neste sentido, o presidente de Acruaga abonda que a acción formativa desenvolvida ao longo do día de hoxe “dá reposta a unha forte demanda interna, por parte das adegas, de realizar en Galicia un curso homologado por WSET”.

WSET (Wine & Spirit Education Trust) é unha organización con sé en Londres e estendida por todo o mundo que conseguiu converterse en referencia mundial na formación do viño. Os seus cursos caracterízanse por estar orientados a un enfoque internacional de viño.

+ información

A Xunta aposta pola internacionalización dos viños e augardentes galegos apoiando a súa presenza en feiras como a London Wine Fair

Londres (Reino Unido), 8 de xuño de 2022 O conselleiro do Medio Rural, José González, acompañado polo director da Axencia Galega da Calidade Alimentaria, José Luis Cabarcos, achegouse hoxe, por segunda xornada consecutiva, ao London Wine Fair 2022, para apoiar a promoción dos viños e augardentes galegos neste certame internacional.

No seu percorrido polos diferentes postos desta feira, o conselleiro reafirmou o compromiso e apoio da Xunta ao sector vitivinícola galego, que se manifesta -salientou- mediante iniciativas como a Estratexia de dinamización económica, territorial e turística das comarcas vitivinícolas de Galicia. Esta ferramenta, elaborada pola Xunta en colaboración coa Fundación Juana de Vega, as universidades galegas e os axentes do propio sector, foi definida por González como unha “folla de ruta” para o futuro destas producións.

Entre outras moitas actuacións, esta Estratexia deseña diferentes medidas para favorecer a internacionalización dos viños da nosa comunidade. Moitas delas vinculadas especialmente coa súa promoción nos diversos mercados, a través, por exemplo, da presenza en feiras e eventos como este que se celebra ata mañá xoves na capital británica e no que participan preto de 120 adegas e outras empresas comercializadoras de viños e augardentes galegos.

A organización de viaxes de familiarización a Galicia de prescriptores e especialistas do mundo do viño -xornalistas, blogueiros e expertos- constitúe outra das vías para favorecer esa internacionalización, así como o reforzo da presenza dos produtos galegos en publicacións especializadas.

Lei da calidade alimentaria

A todo este labor súmase, tal e como destacou o conselleiro, a futura Lei da calidade alimentaria, que vai impulsar de maneira notoria as producións agroalimentarias galegas en xeral, entre elas os nosos viños e augardentes. Así, González afirmou que esta norma ten como principal obxectivo procurar unha nova dimensión no mercado nacional e internacional para os produtos galegos, favorecendo ao tempo o desenvolvemento local, a creación de emprego e a diversidade produtiva, así como proporcionando ás persoas consumidoras todas as garantías.

Nesta feira de Londres teñen presenza tanto as indicacións xeográficas protexidas de augardentes e licores de Galicia como as cinco denominacións de orixe vitivinícolas da nosa comunidade, que son as de Monterrei, Ribeira Sacra, Ribeiro, Valdeorras e Rías Baixas. Esta última é a máis exportadora das galegas e ten no británico o seu segundo mercado internacional máis importante (despois de Estados Unidos), cunhas exportacións ao Reino Unido de algo máis de 2,4 millóns de litros no último exercicio e cun incremento do 13,6% en relación coa anterior campaña.

+ información

Os viños, augardentes e licores tradicionais galegos promocionaranse de forma conxunta esta semana na London Wine Fair

Santiago de Compostela, 05 de xuño de 2022.- Un total de 120 adegas galegas e oito empresas comercializadoras e destilerías de augardentes e licores tradicionais darán a coñecer preto de 150 referencias de viños brancos e tintos e tamén de destilados entre o 7 e o 9 de xuño na London Wine Fair, un dos foros de promoción vinícola máis relevantes de Europa que se celebra na capital británica.

Trátase da segunda acción de promoción conxunta levada a cabo pola Asociación de Consellos Reguladores do Viño de Galicia e a II.GG Augardentes e Licores Tradicionais de Galicia (ACRUAGA), tras a experiencia do pasado mes de febreiro en París, na Feira Vinexpo, que foi “todo un éxito” segundo recalca o presidente desta entidade, Juan Gil de Araujo.

“Esta acción promocional e divulgativa dos viños, augardentes e licores tradicionais galegas é posible grazas ao decidido apoio do IGAPE”, salienta Gil de Araujo. O presidente de ACRUAGA considera tamén que a promoción conxunta dos viños, licores e destilados galegos nalgúns dos foros máis importantes do continente, como é  o caso da London Wine Fair, axuda a promover a internacionalización dos “magníficos produtos que elaboran en Galicia as nosas adegas e destilerías” e a por en valor “os diferentes territorios amparados da nosa Comunidade Autónoma”.

“Os viños en Galicia son diversos segundo a zona na que se elaboran e as variedades que lle dan corpo, pero estas diferenzas lonxe de restar, suman, e permiten trasladar no exterior a idea de que contamos cunha ampla gama de paisaxes, territorios e modos de facer  que nos permiten crear viños diferentes, que sorprenden pola súa franqueza e non deixan indiferentes aos consumidores”, abonda o presidente de ACRUAGA.

London Wine Fair

Tras a pandemia, a London Wine Fair recupera o seu carácter presencial entre o 7 e o 9 de xuño de 2022. Está previsto que máis de 14.500 profesionais ligados ao eido do viño e das bebidas espirituosas participen nesta edición do foro, un dos máis relevantes de cantos se celebran en Europa.

+ información

Juan Gil de Araujo, reelixido presidente da Asociación de Consellos Reguladores Vitivinícolas Galegos e das II.GG Augardentes e Licores Tradicionais de Galicia (Acruaga)

Boqueixón (A Coruña), 15 de marzo de 2022.- A Asociación de Consellos Reguladores Vitivinícolas Galegos e das II.GG Augardentes e Licores Tradicionais de Galicia (Acruaga), constituida para dar cumprimento ao convenio suscrito entre o IGAPE e os cinco consellos reguladores vitivinícolas e o das indicacións xeográficas da augardente e dos licores tradicionales de Galicia para a promoción internacional dos produtos amparados baixo estes selos de calidade diferenciada, celebrou hoxe unha asemblea xeral no Pazo de Quián, en Boqueixón, para renovar o seu equipo de goberno. 

Por unanimidade, decidiuse prorrogar os cargos actuais ata as vindeiras eleccións dos consellos reguladores. Así, Juan Gil de Araujo, presidente da D.O. Rías Baixas, seguirá sendo presidente da asociación, mentres que José Luis García Pando, presidente da D.O. Valdeorras, renovará como vicepresidente do organismo.

Tras a asemblea xeral, en xunta directiva Acruaga, dirixida polo equipo reitor, decidíronse as seguinte saccións formativas, promocionais e informativas que desenvolverá, entre as que salientan a posta en marcha, no último trimestre do ano, do II Programa Superior en Dirección e Xestión de Empresas Vitivinícolas en cooperación coa Galicia Business School. Ao igual que a primeira edición, esta nova quenda do programa persegue o obxectivo de favorecer a competitividade e a internacionalización das empresas vitivinícolas galegas e tamén do sector do augardente e dos licores tradicionais.

Participación na London Wine Fair

A Asociación de Consellos Reguladores do Viño, Augardentes e Licores Tradicionais de Galicia, decidiu tamén hoxe proponer ao IGAPE a participación cun stand promocional conxunto na próxima London WineFair, o foro vinícola máis importantes de cantos se celebran no Reino Unido, no mes de xuño.

En paralelo, estudará a posible celebración dun acto promocional, tamén conxunto, en Lisboa, así como a posibilidade de promover unha misión inversa traendo aos diferentes territorios amparados galegos a xornalistas de prestixio relacionados co eido do viño e dos licores, e a outros prescritores. 

Para todo isto, a entidade contará en 2022 con máis de 330.000 euros de orzamento, un presuposto que procede na súa meirande parte do IGAPE e que permitirá tamén acudir en 2023 a unha nova edición de Vinexpo, en París.

Acruaga impulsa accións de formación e difusión dos produtos amparados polos seis organismos integrados na iniciativa: os consellos reguladores de Monterrei, Rías Baixas, Ribeira Sacra, Ribeiro e Valdeorras -no caso dos viños- e Augardentes e Licores Tradicionais de Galicia. 

+ información